« BANQUE MONDIALE » LEBAL NA SENEGAAL, 651 MILIYAARI FCFA

Ci talaatay démb ji la “Banque mondiale” siiwal ne nangu na a lebal Senegaal koppar yu tollu ci 115i miliyoŋ ciy dolaar, yemook 65i miliyaari CFA. Bor boobu, li mu ko duggee mooy dooleel caytug koppari bokkeef gi te yokk anam yi ñuy dajalee xaalis bi ci biir réew mi. Bor boobu nag, jaarees na ko ci kurél gees duppee IDA (Association internationale de développement). Ba tay, bor bi day dugg ci naaluw SEN-FINTRAC 2025-2029 (Programme pour la transparence dans la gestion des finances publiques et l’assainissement des finances publiques).  Naal woowoo ngi wéeru ci “Sémbuw Senegaal 2050” te jubluwaayam mooy fexe ba leeral anam bees di saytoo koppari réew mi.

Bor bi “Banque mondiale” lebal Senegaal a ngi aju ci naaluw SEN-FISCALE (Programme de renforcement de la viabilité budgétaire du Sénégal). Loolu day firndeel kóolute gi campeefu koppar gi am ci Càmmug Senegaal. Xaalis boobu ñu lebal Senegaal nag, lees ko dugge mooy dëgëral ak a ñoŋal coppite yi Càmm gi war a amal ngir suuxat yokkute gu daj, yombal liggéeyu banqaasi Bokkeef gi te dëgëral koom-koom gi ba muy mën di dékku jafe-jafey koom-koom yeek njuux yi ñu mën a gaar.

“Noo ngi rafetlu dogu bi Càmm gi dogu ci wàllu leeral ñeel bor bi ak ci caytuwiinu koppari réew mi. Ndogal lii dafay jàppale Senegaal ngir mu tëral ag nosteg caytu ñeel koppari réew mi ci anam bu leer, dëppoo ak yoon te dëgër.” (Kàdduy Keiko Miwa, njiitul banqaasu Banque Mondiale fi Senegaal)

Naal wi dafa aju ci ñetti fànn :

– Caytug koppari réew mi

– Jàppandal boru réew mi

– Dajale alali réew mi

115i miliyoŋi dolaar yooyu “Banque mondiale”, day séddaliku ci : 105i miliyoŋ yuy aju ci njureef yi, kopparal naali coppite yi ; 10i miliyoŋ ci fànnu ndimbalug xarala, caytug coppite gi, copparñi nimerig bi ak dooleel campeef yi.